ప్రతి విషయంలో గోతికాడ నక్కల్లాగా ఎదురుచూస్తున్నాయి: హోంమంత్రి అనిత

కూటమి ప్రభుత్వంపై సాక్షి మీడియా, వైసీపీ తప్పుడు వార్తలు ప్రచారం చేస్తున్నాయని, ఇలాంటివి పునరావృతమైతే కఠిన చర్యలు తీసుకుంటామని ఆంధ్రప్రదేశ్ హోంశాఖ మంత్రి వంగలపూడి అనిత తీవ్రంగా హెచ్చరించారు. నిన్న సచివాలయంలో ఆమె మీడియాతో మాట్లాడుతూ.. సున్నితమైన అంశాలపై కూడా వాస్తవాలను వక్రీకరిస్తూ ప్రజలను తప్పుదోవ పట్టిస్తున్నారని మండిపడ్డారు.
 
ఒక ప్రైవేట్ స్కూల్ బాలికపై లైంగిక దాడి జరిగిందని సాక్షి పత్రిక మొదట వార్త రాసి, ఆ తర్వాత రోజు అదే వార్తలో బాధితురాలు బాలిక కాదని, వివాహిత అని పేర్కొనడాన్ని మంత్రి అనిత తప్పుబట్టారు. పత్రికలో మార్పు చేసినప్పటికీ, వైసీపీ మాత్రం తమ అధికారిక ట్విట్టర్ ఖాతాలో బాలికపై లైంగిక దాడి జరిగిందంటూ ఎందుకు ప్రచారం కొనసాగిస్తోందని ఆమె ప్రశ్నించారు. ఇది బాధ్యతారాహిత్యానికి నిదర్శనమని అన్నారు.
 
శ్రీకాకుళం జిల్లా కాశీబుగ్గలో జరిగిన తొక్కిసలాట ఘటనపై కూడా వైసీపీ సోషల్ మీడియాలో కల్పిత కథనాలను ప్రచారం చేసిందని మంత్రి అనిత ఆరోపించారు. "బాలికల మాన ప్రాణాలు, ప్రజల చావుల మీద కూడా ఇలాంటి రాజకీయాలు అవసరమా?" అని ఆమె తీవ్ర ఆగ్రహం వ్యక్తం చేశారు. ప్రతి అంశంలోనూ సాక్షి, వైసీపీలు గోతికాడ నక్కల్లా పొంచి ఉండి, ప్రభుత్వ ప్రతిష్టను దెబ్బతీయాలని చూస్తున్నాయని ఎద్దేవా చేశారు.
 
ప్రభుత్వంపై సద్విమర్శలు చేస్తే స్వీకరిస్తామని, అంతేగానీ ఇలాంటి అబద్ధపు ప్రచారాలను సహించబోమని స్పష్టం చేశారు. సున్నితమైన అంశాల్లో తప్పుడు వార్తలు రాయడంపై తాము ఇప్పటికే చర్చించామని, భవిష్యత్తులో ఇలాంటివి పునరావృతమైతే చట్ట ప్రకారం కఠిన చర్యలు ఉంటాయని హోంమంత్రి అనిత హెచ్చరించారు.